政情：山徑修復慢九拍黃國斥政府趕客

之前同大家講過，議員黃國收到投訴話城門水塘行山徑經歷颱風近兩個月，但仍然滿路山泥碎石、塌樹枯枝，危機四伏，催促政府盡快派員修復，但事隔一個禮拜佢又再親自視察，發覺境況依舊，轟政府唔係以民為本、急市民所急嘅施政作風。

蘇拉距今兩月仍未清理

黃國喺社交平台貼文，話入秋係郊遊旺季，城門水塘係熱門郊遊點，有好多遊人，唔少係外地遊客，但日前見到行山徑嘅「劣境」，都忍唔住發火話清理山泥碎石、塌樹枯枝等工作，並非鞏固防土牆嘅大工程。但睇番颱風「蘇拉」距今已近兩個月，竟然仲未完成清理，好多地方只係拉起警戒線，封咗就算，試圖勸阻遊人前行，佢表明實在難以接受。

旅客人數不似疫前，政府聲言要吸客話要推夜繽紛搞活夜市。黃國指近年好多內地或外國遊客嚟香港嘅重頭活動就係行山，不但成為香港旅遊嘅名片，亦能夠促使更多港人留港活動。

黃國話行山雖然唔會有太多消費，但旅客因行山而留港過夜，市民相約行山後聚餐、消遣等活動都能帶動消費，促使市道更暢旺，佢敦促有關部門統籌做好熱門郊遊點嘅風後清理，咁樣先可以既保障遊人安全，亦係振興旅業、帶動消費嘅重要舉措。

話時話，喺呢幾次嘅假期，出境人數比入境嘅人數多。雖則政府推出夜繽紛，想吸引多啲遊客嚟香港，同埋留住港人喺本地消費，但有飲食業人士話喺過咗嘅重陽假期，仍然好多港人北上消費，即係呢種舉動已經成為習慣，就連飲食界都話業界嘅收入較以前減少，認為夜繽紛嘅效果有限，叫政府變招。

正如黃國話齋，唔單止夜繽紛，行山都係吸引外來旅客嘅品牌。雖則清理颱風後嘅枯枝爛樹係有緩急先後嘅，但政府一味拖住唔清理行山徑，咪等於趕客囉！睇嚟捉蟲喎。