昔日東方笑看天下：南海掀惡浪 中國頭痕
今年8月初，中菲喺南海圍繞仁愛礁發生衝突後，日前又發生兩度撞船事件。中國海警公布，本月22日依法阻攔菲律賓船隻，向仁愛礁非法「坐灘」嘅軍艦馬德雷山號運送違規建築物資；菲方則指控中國海警船衝撞菲方補給船。中方回應時反斥菲方行徑嚴重違反國際海上避碰規則，威脅中方艦船航行安全，而中方操作專業規範、正當合法。責任完全在菲方。南海主權之爭由來已久，菲律賓國小卻敢向中國多番挑釁，爭奪南海島礁主權，眾所皆知全靠美國撐腰。
早前菲律賓國防部長特奧多羅接受美媒訪問時更仿似食咗幾擔蒜頭，口氣不小，佢話唔阻止北京當局，中國將進一步蠶食菲律賓主權及領土，並強調喺專屬經濟區內拒不退讓！中國想呢隻「小鬼」停止「侵權」纏擾，單靠「警告」恐無補於事。至於另一「小鬼」越南，則更加難纏。
越南喺南海嘅侵佔行為比之菲律賓更加嚴重。越南喺南海實際控制嘅島礁共29個，爭得最激烈之處係萬安灘，皆因該處附近蘊藏大量石油資源。中國喺上世紀90年代，都想去勘探開採，竟遭越南攔截而被迫停工。其後越南喺萬安灘進行石油勘探，並建設鑽井平台，如此宣示主權又落手採油，中國都無阻止，越南由此更加野心勃勃！今年9月，美國總統拜登訪問越南，宣布兩國關係跳級升至最高層面嘅「全面戰略合作夥伴」，其後又傳出美國正與越南商談出售歷來最大規模嘅軍備，包括美製F16戰機。
最近有指越南二號人物、國家主席武文賞將於11月訪日，落實升級全面戰略夥伴，讓日本可向越南提供防備以牽制中國。看來，南海必掀惡浪，中國縱有能力應付，面對周圍咁多小鬼，畢竟都係頭痕！
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
