政情：的士拒載政府懶捉江玉歡：搞扣分制疊床架屋

由於「黑的」濫收車資、拒載等違法手段嚇壞旅客。為改善的士服務質素，政府擬修例引入的士司機違例扣分制。係咪有效？議員江玉歡（Doreen）日前就遇到兩部的士拒載，話唔少冚旗的士泊喺街等網約order，再加上「白牌車」嘅問題，炮轟政府有法不用、有法不執，反而疊床架屋搞扣分制，亂咁落刀根本解決唔到問題。

立法會正審議緊《2023年道路交通法例（提升個人化點對點交通服務）（修訂）條例草案》及《的士司機違例記分條例草案》。修例唔單止會增加「白牌車」嘅罰則，仲會引入的士扣分制，即係當的士司機干犯相關罪行時會被記分，若累計至某水平時，將會觸發罰則，任何兩年期間內因干犯該等罪行，而累計被記15分或以上者，會被取消駕駛的士資格一段期間。

Doreen尋日喺社交平台貼文，話呢排遊客多咗，但市面上隨手可截嘅的士就少咗，佢前日喺尖沙咀街頭嘗試截的士，兩部的士喺打開咗車門，司機問完目的地後就藉口拒載；喺黃昏時候，Doreen再到佐敦一帶，街道兩旁有好多冚旗的士喺度等候網約order，佢話最近呢啲問題嚴重咗，要搭的士嘅市民惟有用平台叫車或叫Uber。

面對呢啲問題，Doreen提出一連串嘅疑問，包括有冇喺遊客增多後加強對違規嘅的士司機執法？政府有冇面對的士行業千瘡百孔嘅真正因由？政府依家提出嘅的士扣分制係咪可以有效解決問題？最後佢嘅結論係，依家現有的法例不執行，反而係加扣分制只係疊床架屋。

斥亂落刀難解問題

實際上，的士團體強烈反對扣分制。Doreen話香港的士收費算係偏低，政府係咪可以考慮調整收費，令的士行業較為有吸引力？同時，都要正視網約車嘅問題，佢又引述另一位議員李鎮強曾經講過，話依家有公司公開日租車畀Uber司機，可以咁講，想揸就得，對乘客全無保障。佢直指政府對Uber總唔能夠袖手旁觀，規管或取締唔係個太難嘅決定。

Doreen直斥「有法不用、有法不執，怎樣叫我支持扣分制？」佢話要解決問題，首先要先問對問題，胡亂搵一個較易嘅方法嚟落刀，唔能夠解決問題。

提到「白牌車」，航運交通界議員易志明早前都鬧爆政府喺過去取締「白牌車」不力，表明提出修訂，將「白牌車」罪行可判處監禁期增加一倍，由首次被定罪嘅3個月增加至6個月；再次定罪則由6個月增至12個月，以加強阻嚇力。