政情：的士死火 梁子穎借「尿袋」相助

落雨開工但撻唔着車，場面都真係幾狼狽。話說早前打風，天文台預告會喺稍後時間由8號波轉掛3號風球，打工仔梗係準備返工喇！議員梁子穎去咗葵涌安蔭邨視察，期間佢哋喺嘉蔭樓附近見到個的士司機係咁撻車都撻唔着，於是梁子穎就走埋去睇吓，仲好自信咁話一出手就搞得掂，事關佢有俗稱「尿袋」嘅汽車專用行動電源。