政情：幼童發問不斷 狄志遠讚似小議員

本身係社工嘅阿Dick，當然有接觸小朋友嘅經驗。雖然讀幼稚園嘅小朋友都係活潑好動，但一去到立法會嘅兒童圖書館，大家相當安定，無話行出又行入，排排坐咁聆聽阿Dick講解立法會知識，例如有幾多位議員、幾時會開會、主要工作等等，仲要喺問答環節全部答啱啲問題，阿Dick不禁高舉雙手比劃叻叻嘅手勢！

不過最令阿Dick印象深刻者，係小朋友好積極發言同提問。睇番今屆議會，有意見指代議士喺議事堂上坐唔定之餘，即使在席亦好少發言，咁就難怪阿Dick大讚呢班小朋友似「小議員」啦。