昔日東方政情：莎莉蛋糕傳停產 林琳不捨想喊
尋日下晝，會計界議員黃俊碩手持一盒雪藏蛋糕，同議員林琳喺辦公室門外影咗張合照，但點解後者會作狀抹眼淚呢？話說好多港人都食過嘅「莎莉蛋糕」，其澳洲母公司宣布破產。林琳話有關消息非常震撼，事關「莎莉蛋糕」係港人嘅集體回憶咁話。
之不過，集體回憶都有世代之分。林琳話有一段時期，雪藏蛋糕係雪櫃裏面必備之物，其地位等同三色雪糕，雖則非常受小朋友歡迎，然而都係「56k modem」時代嘅事啦！畢竟食品市場競爭激烈，各式外國甜點如馬卡龍、長崎蛋糕等陸續進入消費者視線，結果選擇多咗，港人對雪藏蛋糕嘅寵愛程度亦日漸遜色。林琳坦言，當佢踏入社會之後，都好少買雪藏蛋糕嚟食啦！
黃俊碩聞訊即撲去入貨
儘管雪藏蛋糕嘅地位已今非昔比，但林琳話「莎莉蛋糕」一旦停產，好多人都會唔捨得，而黃俊碩收到消息後更即刻撲出去買番一盒。但佢又話，相信黃俊碩平時都係好少食雪藏蛋糕，否則減肥點會咁成功？
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
