政情：山路滿障礙 黃國嘆清理工作懈怠

之前都講過，香港經兩個颱風同「500年一遇」嘅暴雨摧殘下，多處山泥傾瀉、水浸，補救措施有緩急先後，市區會快啲，離島同郊區就要等等。但要等幾耐呢？又無聽聞有績效指標（KPI）喎。

議員黃國尋日喺社交平台貼文，話超強颱風「蘇拉」上月襲港，9月1日晚掛起10號波，一周後又有世紀黑雨，造成大大小小嘅破壞。佢收到街坊投訴，城門水塘行山徑沿途好多塌樹至今仍未清走，滿地碎石，滿地泥濘容易令人跣低受傷，原本拉起嘅示警膠帶大多已損毀，或令行山人士無法避開風險區域。

城門水塘係熱門嘅行山點，黃國話應該確保沿路暢通同安全，保障市民同遊客，而「蘇拉」距今已超過一個半月，但行山如同障礙賽，一方面易令行山人士受傷，亦會妨礙救援人員到場。

黃國話狂風暴雨後嘅善後工作並不簡單，有先後緩急，當然必須肯定前線工友嘅付出，但係事發一個半月後仍未完全清理，情況唔能夠接受，佢希望政府同外判承辦商增派人手清理，減輕工友嘅工作量，加速行山徑復常。