政情：陳沛良帶立會一日遊 學生問唔停口

陳沛良喺社交平台貼文話由於女兒曾經就讀過呢間學校，所以見到班嚟參觀嘅小學生着住嘅校服，就令佢諗起女兒讀書嘅時候。

咁班小學生對乜嘢最有興趣？陳沛良話佢哋特別關心議員嘅工作同立法會主席嘅健康，例如點樣可以做到議員？議員有啲乜嘢做？議員嘅人工幾多？主席主持會議嘅過程中想去洗手間點算呀，如果主席同代主席都病咗，邊個嚟主持會議？但佢冇講到點回應班小學生喎。

佢話由小學生嘅發問可以睇到佢哋對立法會嘅好奇同關心，甚至有學生同佢講話大個要做議員添！開心嘅時間過得特別快，到咗講拜拜嘅時候，佢就送咗立法會嘅環保紀念筆畀班學生，希望佢哋可以繼續保持住呢份童真，保持對社會嘅關心同憧憬。