政情：港足亞運創歷史 議員睇直播支持

話說足總喺某戲院包場，等球迷入內觀賞呢場大戰，議員鄭泳舜同酒店業主聯會執行總幹事徐英偉都有出席，賽前兩人豎起拇指，遙祝港隊有好成績，然而日本隊實力明顯較高，落敗並不意外，鄭泳舜話港隊今場踢得唔錯，鼓勵佢哋繼續努力，期待銅牌戰賽事咁話。

議員陸頌雄就「擔櫈仔、坐頭位」，好緊張咁睇住電視直播。事後佢話香港隊雖敗不辱，力戰至最後一秒鐘。佢認為港隊只要肯拚搏，加上大家嘅支持，香港足球一定有所進步。雖然無緣角逐冠軍，但佢期望港隊能收拾心情，準備季軍戰。

當賽事開始嘅一刻，議員狄志遠就對住電視，隔空為港隊打氣，平時冇留鬚嘅佢，此刻變咗「二撇雞」，臉上仲多咗紅、白旗幟添！佢話聽同事講，睇波之時臉上貼張貼紙，零舍有氣氛咁話。