政情：立會首間組裝議辦到家

話時話，擴建工程已展開一年，梁君彥早前視察過施工情況，話受到今年雨量多嘅影響，承建商要追回擴建工程嘅進度添！佢當時亦預告10月起就會安裝議員辦公室組件。議辦係採用組裝合成法，佢尋日喺社交平台貼文話首批組件啱啱喺10月1日經水路運抵香港，而好多組件都超過2.5米闊，基於交通安全，必須得到運輸署特別批准，先可以喺特定時段喺指定馬路上運送至工地，加上裝嵌組件涉及噪音工作，因此承辦商主要會喺晚間進行裝嵌工程。

綜合大樓新建嘅議員樓層喺11至14樓，每層都有15間議員辦公室同相關設施，例如會客室、洗手間同茶水間。每間議員辦公室面積約60平方米，由3個組件裝嵌而成：議員「波士房」係一個組件，議員職員嘅開放式辦公室則由兩個組件合成，所以單係新建嘅議員樓層就有超過200個組件。

組裝合成法好似「砌積木」，但梁君彥話當中大有學問。佢話喺裝嵌過程中，組件逐一由地面向高空吊運，再向下精準地安放喺指定位置，全程必須精密計算、細心調校、一絲不苟，要百分百「啱key」，先可以令每個辦公室內嘅組件之間、各個辦公室之間、組件到核心部件之間，包括建築結構、「風火水電」系統嘅接駁等，都能夠無縫接合，以確保整個樓層安全穩固，而相關設施都能夠有效運作。

幾時完成裝嵌？佢話預計每日可完成組裝一至兩間議員辦公室，目標係今年年底之前，可完成裝嵌新建議員樓層嘅所有辦公室同設施。

立法會擴建工程唔單止喺大樓嘅高座新建11至14樓嘅議辦樓層，仲有地下至10樓一個三角區域嘅擴建部分，最遲2025年6月完成，而第二期工程就包括新增會議室同搬遷教育設施，將喺2025年年中展開，為期9個月。