昔日東方笑看天下：知情識趣 止戰和談
俄烏戰事持續超過一年半，而烏軍開展3個多月嘅大反攻，效果不似預期，且形勢對烏克蘭的確不妙，波蘭表示不再提供武器。唔好忘記，波蘭供給烏克蘭嘅軍援排第6位，僅次於美國、德國、英國、挪威和丹麥，真金白銀都33億美元吖！更重要嘅係，波蘭收留咗150萬名烏國難民，此時此刻，如果連波蘭咁堅定嘅盟友都對撐烏動搖，其他西方國家可想而知！
呢嗱！戰事嚟到呢刻，再拖下去，烏克蘭短期內根本冇可能大捷，而俄羅斯總統普京一定不惜一切戰鬥下去，喺咁嘅形勢下，據悉不少西方國家已出現「烏克蘭疲勞」，即係對戲子總統澤連斯基嘅支持動搖。講真，以美國及西方國家投入咁龐大嘅軍援，大反攻打咗逾3個月，亦不過係一兩處地點稍為突破俄軍嘅防線，烏軍又常虛報戰情，你話歐美國家點會唔質疑佢死人燈籠報大數！
事實上，烏克蘭國防部情報總局局長布達諾夫曾經表示，美國援助嘅31輛M1阿布拉姆斯主戰坦克，只應投入特定嘅突破作戰中，否則好快會被俄軍摧毀。布達諾夫認為，從美國接收100枚陸軍戰術導彈系統（ATACMS），並不能改變前線局勢。ATACMS具全天候能力，特別適合很多時氣象環境都不利空中攻擊嘅烏克蘭地區使用。專家就指難靠此大幅改寫戰局，因為它並非靈丹妙藥，佢仍需以裝甲戰鬥車、坦克、軍機等組成至少10個旅，即約5萬至10萬人，並同時把他們投入戰場！試問烏克蘭如何能有咁多人力物力？更何況，美國真係可以源源不絕咁供應每枚成本約85萬美元嘅ATACMS嗎？老美自身財困，拜登又忙於爭取連任，支持澤連斯基恐亦有心無力！澤氏若知情識趣，快找機會同普京止戰和談，否則一定冇好下場！
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
