笑看天下：拜登連任之路難行

拜登面對嘅除咗槍擊案嚴重，治安大壞，盜賊如毛，大家經常可以從電視新聞，見到啲人連群結隊一哄而上入店舖瘋狂搶貨物，不！係搬貨物，不消一炷香時辰，已將成間店舖嘅貨物搜掠一空！據美國零售業聯會（NRF）估計，美國零售業今年將因盜竊及相關罪行損失近1,000億美元，較2017年嘅468億美元急增逾倍。之所以盜賊如毛，原因複雜，如通脹、貧富懸殊、道德衰微等；更有趣嘅係因為監獄營運成本高昂，加州政府修改刑法條例，高買刑罰由監禁最少16個月嘅嚴重罪行，改為涉及貨品價值不超過950美元便屬於輕微罪行，是以壯大賊人嘅膽；更何況喺美國輕易買到槍械，店員亦不敢阻止賊人，你話有乜辦法唔盜賊如毛？所以要競選明年嘅美國總統，政綱不必陳義過高，甚麼讓美國再強大全是廢話，有本事係先搞好治安！

呢，為了令拜登爭取連任，據說另一個關鍵就係防止佢跌倒，民調大比數指拜登「老到不行了」，多次跌倒令外界關心佢身體機能，咁又係，拜登若連任，將以82歲高齡展開第二個任期，卸任時86歲，呢個紀錄確難破！拜登為改善跌倒，已少穿皮鞋，改穿運動鞋或行山鞋，兩年前開始見物理治療師加強身體平衡力；又從空軍一號落機時改用較近地面嘅出口，樓梯長度縮短一半，老朽倒想起「削足適履」和「強扭的瓜不甜」，拜登連任之路難行也！