政情：訪德壽宮遺址 邱達根嘆為觀止

Duncan今個月不停咁喺香港同杭州兩邊走，正如早幾日見佢喺杭州支持參加亞運會嘅香港運動員，睇過壁球賽事，前日朝早見佢喺香港出席活動，尋晚又現身杭州嘞！仲去咗個好特別嘅地方添！

乜嘢地方？喺遺址呀！Duncan喺社交平台話尋晚應邀出席「杭州人才日中秋慶祝活動」，活動地點係舊年先至對外開放嘅德壽宮遺址博物館。據介紹，德壽宮遺址1984年首次被發現，係南宋重要嘅宮苑遺址，先後經歷4次大規模嘅考古發掘，喺2020年正式動工建造德壽宮遺址博物館，今次係開館後首次舉行嘅大型活動。

喺Duncan上載嘅相可見，宮內庭園好優雅，又配合唔同顏色嘅射燈，再加上精彩嘅歌舞同文化活動，佢形容係展現咗杭州文化、科技、創意同保育方面嘅成就。睇嚟呢個晚會令佢眼界大開。