政情：管浩鳴加入關愛隊 冀獲覆診數據

管牧話自己之所以做副隊長係因為李鎮強向佢招手，加上自己係福利事務委員會、以及民政及文化體育事務委員會嘅委員，關愛隊嘅活動當然係義不容辭。加上管牧喺政界亦一向以籌款能力見長，佢亦透露自己今次有幫翠德關愛隊，向外界「揼心口」籌款。

對於未來嘅活動，管牧就話暫時未可透露，不過佢就希望嚟緊政府可以向關愛隊提供數據，例如有邊啲人可能好耐冇覆診咁，等關愛隊有所掌握，以便進行後續跟進措施，由於關愛隊目前喺地區嘅工作主要靠「地膽」去物色需要關懷嘅人，但如果有「大數據」嘅話佢哋嘅服務就可以更精準。