政情：黃俊碩返娘家 原來係土瓜灣

Edmund喺社交平台貼文，話佢嘅地區辦事處同土瓜灣街坊會日前搞咗個中秋敬老聯歡晚宴，令佢可以同土瓜灣嘅街坊街里敍舊。Edmund跟住話好多朋友都問佢，點解經常去土瓜灣做地區服務。

開始講古嘞！Edmund話其實由爺爺嗰代開始，已經扎根同服務土瓜灣。佢細個亦跟隨爺爺同爸爸到土瓜灣「出入」，而且每一次到土瓜灣，都會感受到街坊濃厚嘅人情味，而每次去到街坊福利會，就會回想起由細到大喺嗰度所經歷嘅點點滴滴，令佢有一種返咗「娘家」嘅親切感，所以佢好高興可以喺「娘家」同咁多位街坊街里一齊迎中秋。

香港經濟未復甦，Edmund都不忘呼籲街坊好好享受嚟緊中秋連住10‧1嘅3日小長假，仲要多啲出街消費，多啲光顧土瓜灣區嘅食肆商戶，以帶旺該區，振興本土經濟。