政情：公交總站防洪無效 竹園鄉民鬧爆

興建黃大仙公共運輸總站本身係一件惠民嘅好事，之不過因為呢個工程喺沙田坳道南迴旋處進行加擋土牆及整改工程，令到暴雨期間，雨水由山上向下流，到達沙田坳道同鳳德街交界開始後，被呢個擋土牆分隔。原本問題都唔大，但迴旋處引水道同排水渠工程未完工，導致無法發揮效用，最終導致洪水急湧至竹園鄉內。

咁應該點處理呢？楊永杰話已經要求路政署同港鐵代表盡快完成工程，研究加深地下引水渠嘅深度同擴闊雨水收集口嘅寬度，以加強疏水功能，港鐵方都話要進行相關研究。楊永杰話雨季尚未結束，希望可以盡快聽到好消息啦！