政情：最後一次監誓醫科生 陳家亮傳承孝心

290多名醫科新生穿上白袍，宣讀誓詞，承諾尊重生命，肩負白袍重任，盡心盡力照顧病人。陳家亮同時提醒學生要感激父母養育之恩同老師多年教導，因為「孝敬父母、尊師重道」係中大醫學院核心價值，無論日後擁有多驕人嘅成就，都要謹記以謙卑嘅態度終身學習，用憐憫之心對待困苦無助嘅病人。

陳家亮又話好幸運可以同一班永遠將學生放喺首位嘅教職員一起同工，而佢將會繼續追夢，實現理想，希望學生都能夠無畏無懼，為理想勇往直前。

陳家亮嘅任期將於明年1月31日屆滿，中大醫學院新任院長嘅招聘程序已展開，佢曾講卸任後又係一個新嘅開始，會繼續追求夢想，但求無悔今生。