政情：為六合彩監場 劉國勳自爆冇中獎

劉國勳話自己做咗太平紳士都有一段時間，不過咁耐都未試過被邀請去監場，佢笑言唔知係咪因為自己之前係博彩及獎券事務委員會成員，最近任期屆滿先至有咁嘅機會。佢話去監場之前曾問清楚，原來負責監場都可以投注之後，亦專登買咗六合彩。儘管頭獎無人中，不過二獎就有兩注中、中三獎更高達42注！可惜咁多中獎機會都同佢無緣，惟有保存彩票叫做留個紀念。

佢又提到由六合彩而嚟嘅獎券基金，唔少社福團體都相當關注，因為呢個基金有時會撥錢畀相關團體，甚至支持一啲地區倡議，譬如喺古洞北新發展區興建福利服務綜合大樓。