政情：家長霸凌投訴 教師怨氣滿肚

朱國強話「怪獸家長」、「無理家長」嘅問題近年喺香港屢見不鮮，好多老師同校長都有向佢反映，話有家長濫作投訴，成日上綱上線，揚言話動用媒體，甚至政治人物同教育局，威脅將教師投訴到底，令老師丟飯碗，藉住施壓迫使教師、校長同法團校董會屈服，但實際上係出於私利，甚至宣洩情緒。佢話近呢兩年嘅情況嚴重好多，有可能同家長壓力大、精神困擾，又唔識處理有關。

家長呢啲行為，佢話唔單止可能係家長本身有情緒困擾，佢收到好多個案係老師因而受到傷害、有情緒問題，甚至有失眠等影響身體嘅症狀，為咗更了解老師情況，佢都草擬緊問卷諗住做個調查。

朱國強直言依家政府政策對呢啲家長係「冇佢符」，而隨住學校投訴機制全面落實，家長投訴由校本處理，呢個機制往往被家長偏見所誤解，以為係「自己人查自己人」，家長又唔肯同學校多啲溝通，對調查結果都「唔服氣」，所以佢建議教育局應該要引入第三方人士調解及介入，例如搵經驗豐富嘅退休校長或者教育局官員幫手，令投訴得以正確處理。

朱國強話咁做學校可以將精力投入教學，又話當局都應該要加強家長教育同公眾宣傳，增加家長對學校嘅信任、對校政同投訴機制嘅認知，減少無理投訴咁話。

其實佢話早前喺立法會都提議過如果家長有明顯嘅長期負面狀態，而有專家可以證明會導致壞影響，可以規定要家長接受輔導、上課程等，而引入第三方人士調解呢個建議，佢之後都會向立法會教育事務委員會提出討論呢個議程。