政情：批評港鐵事後補飛 張欣宇轉軚被指離地

張欣宇前日朝早約11時30分喺網上貼文，講述之前一日凌晨約2點，有港鐵前線同事情緒接近崩潰咁同佢講，管理層要求佢哋趕往黃大仙站協助清走站內積水。佢認為呢個要求毫無邏輯、漠視前線同事嘅生命安危。佢立即聯絡港鐵高層要求介入，且得到相關承諾，但之後見到網上流傳嘅相，實在令人失望甚至憤怒，又話作為立法會鐵路事宜小組副主席嘅佢，一定會就呢件事跟進到底。

相隔約12個鐘後張欣宇發表另一則貼文，就港鐵喺隧道水浸期間嘅維修安排而表達意見後，引起好多港鐵前線員工嘅共情，亦聽到唔少不同嘅聲音，令佢有更多唔同角度嘅考慮。話相信走入水浸後隧道嘅同事唔係被迫嘅，無意否定喺現場指揮嘅管理層代表，當中好多人曾經係佢鐵路生涯中嘅上司甚至導師，能夠理解佢哋做出嘅好多決定，係源自港鐵一直以來強調嘅「Can-Do」文化，同埋鐵路服務承諾中「Keep City Moving」嘅情懷。

然而佢亦睇到市民、議會同政府確實對港鐵管理層有諸多要求同壓力，儘管此舉能推動港鐵服務嘅進步，但亦衍生顯著嘅副作用，譬如對提供同恢復服務嘅進度過於執着，常常出現「Over Deliver」嘅傾向。而面對前日嘅天災，喺完全水浸嘅車站，相關搶修工作理應喺天氣穩定之後再全面開展，最大程度保障搶修人員嘅安全，而喺天災過後，「遲幾個小時恢復通車，真的沒那麼要緊」。

張欣宇嘅講法雖獲少數網民認同，但批評嘅留言更多，有人話「每月收數十萬納稅人血汗錢的薪酬，卻不是站在香港利益的高度去思考問題，那不如離開立法會議員的崗位，做回你的站長去捍衞基層員工的利益好了。」

另有網民質疑「當值人員嘅安全就不是安全？倘若今日真的發生了人命事故，我相信你一定不會寫上這篇『補飛文』去討好當權者和高層！請你這位前員工好好回憶港鐵公司的首要宗旨『安全為先』，並着力勞工局長審視港鐵安全程序是否有不當及盡快作出改善！」

佢就回應話「我不認同當時工作的環境是安全，我亦不同意當時值得這樣去做，這樣所謂的Can-Do文化，我完全不認同。這點我們完全一致。」