政情：沙田水浸渠塞 李梓敬筲箕撈雜物

膠筲箕？當然喇！水浸就因為啲渠塞咗去唔到水吖嘛！話說沙田圍站對出嘅逸泰街，暴雨下變咗一條泥河，的士都浸晒。李梓敬同班兄弟姊妹就用膠筲箕，撈起浸喺泥水裏面嘅垃圾。

由於完全睇唔到黃泥水下嘅渠口位，佢哋都係估估吓，或者探手入黃泥水裏面摸索，確定有渠口就索性抓起塞住嘅垃圾，務求可以快啲去水。搞咗幾耐？幾個人夾手夾腳努力咗一粒鐘，一條河變番一條街嘞！

實際上，油尖旺同深水埗亦出現水浸同大量淤泥嘅情況，議員鄭泳舜就落區剷泥，幫手清理堵塞渠口嘅雜物樹枝等。佢仲話所有暴雨警告雖已取消，但世紀暴雨過後，市區路面濕滑且有積水，亦有山泥傾瀉風險，呼籲市民外出時要小心注意安全。