政情：參觀粉嶺高球「舊場」 姚柏良讚賞

政府現時開放高球場一、二、三號洞作為臨時公園，畀市民參觀。今個星期一係開放嘅第一日，姚柏良都有親赴現場了解情況。佢話粉嶺高爾夫球場作為全亞洲最古老、歷史最悠久嘅高爾夫球場，綠草如茵嘅球道同各種壯觀嘅古樹，構成一幅幅美麗嘅圖畫，吸引唔少市民前來觀賞。佢話同部分市民傾過，大家都覺得呢個地方值得一遊咁話。

經常呼籲政府同業界要發展「五色旅遊」嘅姚柏良，建議康文署要善用高爾夫球場嘅歷史同特色，以發展為歷史文化生態遊嘅新景點，市民既可以喺公園休憩或遊覽，亦可藉此了解高爾夫球呢項運動添！