政情：颱風塌樹佛像完好 梁福元稱奇

梁福元喺社交平台貼文，指颱風「蘇拉」離去後着手清理園內塌樹，發覺浴佛池嘅佛祖以及旁邊嘅佛菩薩像，並無因塌下嘅樹幹而造成一絲傷害。佢話有兩樹幹剛好橫塌喺佛祖頭頂上約一吋位置，而另一斷枝嘅椏亦只輕擦過佛像肩膊、繞過佛身，佢話目睹此情此景，深感佛法無邊，不可思議，向眾佛菩薩頂禮咁話。

之不過，園內嘅農作物就唔係咁好彩啦。梁福元話稍後可以收成嘅有機木瓜樹，被颱風蹂躪得東歪西倒。儘管滿目瘡痍，但佢好樂觀咁話「小小苦楚等於激勵」，指木瓜樹生命力強，只要喺露出根部位置加上有機泥及施肥，就會慢慢復原。