政情：夜巡鼠患黑點 柯創盛有新發現

柯創盛話，儘管政府高度重視鼠患問題，加強資源進行滅鼠工作，更喺觀塘區試行晚間滅鼠，但關乎衞生不可掉以輕心，所以佢去咗一向多老鼠出沒嘅瑞和街街市、翠屏南邨等地視察，發現翠屏南邨嘅花槽位、藍田地鐵站A出口某超市對出嘅位置，都有唔少老鼠蹤迹，仲見到好多老鼠糞便。

而喺巡查開始後，都發現咗一啲黑色盒仔，事後問番食環署，原來係鼠餌盒，裏面放有老鼠藥，呢啲盒仔就放咗喺街邊大約兩個星期，佢話市中心仲有一款T字形嘅盒仔，就放咗大概一個月。

咁成效如何呢？柯創盛覺得仲有進步嘅空間，依家係「比上不足、比下有餘」，而目前放置盒仔嘅時間都未算太長，佢話希望食環署可以喺稍後時間公布捉到幾多老鼠啦。