政情：蘇拉餘波 南區開學險受阻

原來受風雨影響，赤柱一條行車主幹線黃麻角道，前日有一棵有倒塌風險嘅大樹，而由於尋日係開學日，搞到赤柱一班居民心慌慌。不過，南區區議員梁進話，好彩經政府部門協調處理後，成功趕喺朝早處理好件事。

驚險嘅事又點止一單，梁進話石澳大浪灣同石澳村一帶都因為打風而有大量樹木倒塌，巴士公司都擔心會影響未來幾日嘅巴士營運，一度打定輸數話開學日停服務，但好彩係清理好樹木同雜物之後都成功出車，喺開學日如常運作喎。