政情：搞旺夜市 葉劉瞄準女團粉絲

葉劉喺報章撰文話自從政府話要搞夜市，一時之間，「爺孫落吧」、大笪地、睇相占卜等建議此起彼落，但佢都點醒大家，話依家香港夜間經濟冇起色，係因為疫情3年改變港人生活模式，大家習慣咗喺屋企叫外賣、煲劇。

咁依家搞大笪地得唔得呢？葉劉就憶述細個嘅時候去上環新填地、大笪地度照田雞、食碗仔翅，但係佢認為呢啲「平民夜總會」已經唔適用喺依家高度發展、高度規管嘅香港，如果太嘈吵熱鬧就會變成噪音，霓虹光管太繽紛就係光污染，食物都要衞生乾淨咁話。

所以，佢話夜間經濟一定要針對年輕人、專業人士同海外旅客，而且要符合佢哋嘅喜好同埋品味，好似政府可以搞大型音樂會、體育活動、主題嘉年華、文藝展覽、電影節等，仲話應該要邀請南韓女團同內地頂流來香港搞演唱會、見面會，到時一定超多粉絲捧場，順便帶旺市面同周邊活動咁話。