政情:蕭偉強攜眷遊台中 避過颱風
出門旅行,須注意天氣狀況。勞工及福利局前局長蕭偉強前日喺社交專頁,上載佢同太太喺一個淺灘嘅合照。但見佢哋兩人喺晦暗陽光下,頭髮都被風吹到亂晒,瀰漫一片山雨欲來嘅氣氛。天文台唔係早就預報話打風咩?似乎返入室內會安全啲喎。
體驗客家文化 玩挖蠔
其實蕭偉強同太太並非身處香港,而係去咗台灣。話說早幾日佢哋搭飛機出發往台中,當時仍在呂宋島以東嘅颱風「蘇拉」,蕭偉強就已經密切留意其動向,由於預料會逼近台中,佢不禁慨嘆「唔使跟咁貼吖嘛!」不過事情嘅發展係「蘇拉」忽然轉向,結果造就機會畀佢同相識逾半世紀嘅舊同學、與移居台灣嘅教友,齊齊攜眷一日遊,前往苗栗三義鄉,試作客家擂茶同時又品嘗客家菜,然後再到彰化芳苑,體驗當地嘅生態旅遊「海牛採蚵」。
台灣人嘅「採蚵」,即係港人嘅「挖蠔」,而由黃牛拉車到淺灘挖蠔,據講係傳承百年嘅風俗,相當獨特。蕭偉強此行雖避過「蘇拉」,然而氣象預測另一個颱風「海葵」有機會殺入台灣,結果喺回程車上,蕭偉強話風雨鋪天蓋地而來。
人人做記者
爆料方法 :
爆料熱線:
(852) 3600 3600
傳 真:
(852) 3600 8800
SMS:
(852) 6500 6500