政情：紅光嘥氣 倡禁過馬路玩手機

陳紹雄同運輸及物流局官員去咗銅鑼灣波斯富街/富明街過路處，實地視察行人過路燈紅光投射裝置。佢話現場所見，仍有唔少行人無視「紅光」而亂過馬路，而佢過往亦收到唔少市民反映，指「紅燈裝置」喺日間因礙於日照而毫不顯眼，唔少行人忽略紅燈嘅存在，未能起警示作用。

當局預計明年底前，喺總共100個地點完成安裝，而估計每組裝置約需6萬多元，仲要視乎現場環境嘅複雜程度，部分地點嘅安裝費用或會更多。陳紹雄話政府斥巨資喺全港安裝輔助裝置是否物有所值？佢已向運流局官員查詢，政府委託嘅顧問公司所做嘅成效評估，係咪具成本效益？但要等當局提供進一步資料。

低頭族無視紅光照衝燈，睇嚟淨係提醒並唔夠。陳紹雄就當面同在場嘅官員指依家內地多個城市，例如浙江溫州、嘉興、杭州、寧波同福建廈門等地，都已經立法禁止過馬路時低頭睇電子設備，違者將處以罰款，佢亦建議政府不妨借鑑內地經驗，考慮立法將過馬路玩手機嘅低頭族同亂過馬路者一同對待，一律罰款2,000元，避免造成安全隱患。