政情：日核水未闖港海域 魚檔先受衝擊

話說漁農界議員何俊賢（高佬賢）日前去咗屯門三聖邨同元朗大橋街市，了解吓日本排放核污水後對檔戶嘅影響。核污水排咗唔夠一星期，啲水可能仲有百幾日先流到香港海域，但估唔到高佬賢咁快已經收到啲檔戶嘅埋怨，話嚟買海鮮嘅市民比過往少咗，啲檔販估計係同部分消費者持觀望態度有關喎。

高佬賢仲話有人同佢反映，擔心核污水或將係大約一年後流到內地沿岸，希望政府可以做好準備，幫助佢哋應對挑戰。實際上，佢早排已要求政府向受影響人士提供基金。