政情：方龍飛投訴 高鐵班次冇得提早

方龍飛喺社交平台貼文，話當日早上8點40分抵達西九龍高鐵站，打算購買9點20分開出嘅列車前往深圳北站，不過售票員只係向佢提供9點40分嘅車票，理由係擔心佢過關有阻滯。結果方龍飛由離開售票處到過關，只係用咗13分鐘，因此8點53分佢就已經身處候車大堂。佢注意到大堂有一個票務處，於是向票務員詢問，可否更改班次為9點20分，然而票務人員話只能更改班次為開車前45分鐘嘅車票，如果要乘搭9點20分嘅班次，只能重新購票，但之前購買嘅車票則無法退款。

於是方龍飛白白咁等候40幾分鐘，期間佢亦目睹好多有相同遭遇嘅旅客企喺嗰度候車。佢質疑唔允許乘客更改車票，必須重新購票先可以搭早一班車嘅做法，認為「方便」應該喺各方面都能配合，如果港鐵公司能夠彈性處理，相信可以令到旅客感到更加方便。