政情：參觀星洲單位 陸頌雄羨慕又慚愧

唔睇猶自可，一睇就比下去嘞！點解？事關新加坡組屋平靚正囉！陸頌雄喺社交平台貼文，話當地人用約100萬港元左右就可以買到50至100平方米嘅單位，而且計劃靈活，年輕家庭生小朋友之後可以轉大單位，退休時可以大單位轉番小單位套現，作為退休之用。見到千呎組屋，佢都話流晒口水呀！

陸頌雄話喺上世紀70年代，新加坡嘅房屋政策以香港為師，但時至今日香港仍有唔少人住喺不適切房屋，佢作為議員，感到既羨慕又慚愧。

喺參觀期間，咁蹺仲撞到正喺新加坡訪問嘅房屋局局長何永賢、香港房委會成員，同埋新加坡建屋發展局局長陳明銳，何啟明話當時即刻捉住佢哋一齊影相。陸頌雄話大家本着相同嘅目標嚟新加坡取經，社會應要上下一心，排除萬難，解放思想，多管齊下增加土地供應，改善市民生活，又話房屋供應除了要增量外，亦要令市民住得大一啲、好一啲喎。