政情：氣候變化無分彼此 梁榮武嘆大國唔重視

梁榮武話氣象嘅世界，要準確預測並非想像中咁容易，有時都好講運氣，往往係預測錯先至「正常」。而廿年前聯合國世界氣象組織公眾氣象服務會議選擇喺香港召開，當時香港天文台覺得自己肩負一個使命，盼藉住會議作為一個世界橋樑，聯通第三世界同先進國家，而佢喺該次會議所接觸嘅落後國家，發展狀況並唔理想，有時向對方發出電郵但隔好耐都冇回覆，原因係當地嘅通訊基建非常差，而天文台嘅同事都樂於喺技術上或物資上睇吓有乜嘢可以提供協助，而對方嘅感激之情亦令人動容。

2015年巴黎協議，梁榮武話發達國家同意每年籌集1,000億美元，以支援落後國家抵禦氣候變化。但後來承諾嘅金額不但畀唔足，啲錢反而用咗去打仗！佢感慨話目前全人類面對最大嘅問題，就係氣候危機，可惜世界上好多大國嘅領袖，並唔當係一回事，反而將重點放咗去第二度。