政情：離奇消失十幾年 何俊賢床頭書突出現

話說何俊賢失而復得嘅床頭書，係廿年前購入嘅《新譯世說新語》，封底500元嘅價錢標籤仍清晰可見。呢個銀碼莫講話20年前，就算以今日標準而言都係貴，何俊賢話諗極唔明點解當年會捨得買，之不過咁貴嘅書都係偶一為之，佢話之後買書都係講求審慎消費。

至於呢本《新譯世說新語》，佢話只係睇咗三分之一左右，後來喺不知不覺間咁就唔見咗，由於仲有好幾本床頭書，所以佢對於《新譯世說新語》嘅消失，並唔係太在意。

到底呢本失蹤多年嘅床頭書係點樣重見天日呢？何俊賢話近日執屋，結果本書就畀媽媽喺佢嘅床下底搵番出嚟。照咁講，佢豈不是十年都無清理寢室？何俊賢解釋，佢張床係要掀開床褥，再抽起塊床板以存放雜物嘅收納空間，平時真係唔會打開㗎。