昔日東方政情：現實與想像有異 田北辰倡移民前三思
近3年香港人口持續下跌，當中牽涉到移民潮。議員田北辰話聽到唔少人抱怨，話去到外國發現「想像很美好，現實很殘酷」，所以佢主張市民喺移民之前必須做好資料搜集、深思熟慮之後先做決定。
田北辰喺社交平台貼文，話好多人都認為香港已經變咗，所以要走，但佢依家睇番，似乎疫情同防疫措施先至係關鍵。佢認為去外地生活當然有好有唔好，做咁大個決定之前真係要做足功課，最緊要係深思熟慮。
促港府改善社會氣氛
至於政府日前公布錄得10幾萬人淨移入，香港人口止跌回升，田北辰認為「搶人才」政策見成效，但佢強調要因應香港需要而不斷優化，加上輸入勞工亦會影響人口結構，如何喺優質人才、發展勞動力、本地就業等幾方面取得平衡，甚考工夫。
佢又提及早前有刑事紀錄兼涉嫌虛報嘅人，竟可通過優才計劃入境，反映當局把關不嚴，希望唔會再發生。佢又話不論人口升跌，持續改善社會氣氛，無論如何都係政府嘅責任。
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
