政情：買半山單位贈愛女 葉劉有計慳印花稅

話說葉劉淑儀更新利益申報，喺原有自住嘅中西區單位同荃灣嘅工商物業之外，又以今年3月成立、本港註冊公司「Magic Fiddle Limited」嘅名義，「間接擁有一個位於中西區的住宅單位連一個車位作自住用途」。而新購入嘅單位，同佢現居嘅寓所屬於同一幢。睇番公司註冊處紀錄，「Magic Fiddle Limited」嘅創辦成員同董事，就係葉劉同埋佢嘅女兒葉榮欣。葉劉向傳媒表示，新物業嘅購入價係5,180萬元，用嚟畀女兒自住，由於以公司轉讓形式購入，需付稅額只有0.2%，即10.36萬元，等如節省15%嘅印花稅，慳番約766萬元。佢承認呢種買樓方法可以慳稅，況且好多人都係咁做。

由於該單位未有承按紀錄，換言之係一筆過付款。雖然葉劉慳咗稅款，但有銀行估價，該單位若撇除價值約300萬元嘅車位，最新估價約4,600多萬元，即是帳面損失約200多萬元。