昔日東方政情：商戶呻夜晚少人 崔定邦：凡事求平衡
復常之後，經濟反彈唔似預期，過夜旅客比起疫情前大減，夜晚好早就人流疏落，搞到唔少商戶都叫苦連天。旅遊促進會總幹事崔定邦就唔係咁睇喎，佢覺得凡事求平衡，早啲返屋企，唔使長加班，未嘗唔係好事喎。唔知佢係咪都算係樂得清靜呢？
感嘆時代改變
話說崔定邦月初喺社交平台貼文，講到依家夜晚好似提早咗咁。佢話疫情後平日晚上11點嘅將軍澳，就好似凌晨一、兩點，無咗行完街落地鐵嘅人群。
聽到就好似好慘咁啦！但佢似乎就有另一種睇法喎。佢話覺得時代改變，形勢改變咗，或者要適應吓，「如果早啲返屋企， 唔使長OT，開心食晚飯，陪伴屋企人，其實未嘗唔好」，仲話凡事求平衡。唔知係咪覺得呢番說話同業界嘅諗法唔多對嘴形，佢都補咗句話「純粹個人睇法，不代表行業和促進會」。
其實政府近日放緊風話要推吓夜市政策，而呢個貼文都出咗半個月，唔知佢依家嘅睇法有冇變呢？
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
