政情：葉劉客串酒樓侍應 聆聽前線心聲

其實呢個「客串」酒樓侍應嘅人士正正係議員葉劉淑儀，事關香港勞動力短缺，飲食業更係長期唔夠人，葉太便借機親身了解酒樓運作。佢尋日朝早到港島西區一酒樓體驗前線員工工作，只見葉太手帶藍色膠手套，身穿侍應嘅制服，推住點心車送茶點予顧客，難怪無人認得出啦！

不過亦有眼尖嘅茶客，其中就有一個年逾九旬嘅伯伯，不得不說係耳聰目明，葉太亦形容阿伯精神奕奕。而其他茶客認出葉太都不自覺露出驚訝表情，紛紛與之傾談，合影留念。

其實有食客都覺得葉太身邊嘅一位侍應亦好眼熟喎，佢正係葉劉淑儀嘅港大師弟兼黨友，石籬區前區議員吳家超，同葉太一齊觀察酒樓運作。葉劉喺社交平台發文話，好樂於與大家近距離交流，可以聆聽前線員工嘅心聲，打成一片。