政情：樂齡科技器材昂貴 鄧家彪：難普及要諗計

Bill去咗樂齡科技教育及租賃服務中心。呢個中心有擺放各種樂齡科技器材嘅模擬家居布置，而佢都有體驗唔同器材，好似輔助餵食器、旋轉式淋浴椅、電動輪椅等。佢就話餵食器最為有趣啦；而電動輪椅就特別便利，因為中心嗰款電動輪椅大約有20公斤重，可以摺疊、插除電池，全方位便利長者出行，甚至上飛機旅遊，雖然買就要3萬蚊，但月租就只需要幾百蚊咋；都有器材價格昂貴，而且未有月租嘅方式，好似可以輔助坐廁起坐嘅起動器咁。

作為社福界議員嘅狄志遠都有去參觀，依家照顧者壓力爆煲，佢話自己試用過樂齡科技器材之後，覺得可以幫輕照顧者唔少，而且租用價錢都可接受，所以都希望樂齡科技可以喺香港普及咁話。

之不過，Bill都有話樂齡科技器材有一個最大嘅問題就係貴，因而窒礙達到普及化嘅目標，咁有咩辦法呢？佢就有幾個計仔，包括政府同社會盡力推廣使用，達到規模效應，降低使用成本；積極引入世界各地包括內地嘅樂齡產品，令長者可以作出選擇，包括價格等最合適嘅器材。

唔單止樂齡科技因為昂貴而入屋困難，Bill都有就老年化社會下政府應該點做畀啲建議，好似要幫助長者融入社區生活；完善家居配備，例如所有長者房屋都應該安裝扶手、感應燈，佢話小小改建雖然唔係高科技，不過都可以防止意外；同埋近排有唔少長者倒斃喺家中長期未被他人發現嘅悲劇性新聞，佢建議政府都要想方設法避免獨居長者失救致死嘅問題。