昔日東方政情：陸頌雄古裝造型 網民話似家丁
近來興起一股懷舊潮流，部分人更身體力行，穿上封建時代嘅古裝以體現「文化自信」。花名「醬爆」嘅議員陸頌雄，日前隨立法會民政及文化體育事務委員會北上杭州進行職務訪問，期間佢同幾位議員同事遊覽橫店影視城，又好「應景」咁穿上古裝拍攝造型照並上載社交平台，貼文話「我呢個造型，大家點睇？」
有網民留言話「劍客造型」，但觀乎戴眼鏡嘅陸頌雄手無寸鐵，點睇都唔係一個武夫；有人問佢係咪迷途嘅小書僮？不過論年紀論身高，點都談不上「小」，加上手執一個竹編雞籠，反而流露幹粗活嘅氣息；亦有網民話係「家丁」，儘管形容比較靠譜，不過陸頌雄並未留言認同呢種睇法。但無論點估都好，一身樸素布衣嘅佢名副其實係「藍領」，都好貼合佢嘅工會背景。
配現代髮型被嘲成碌葛
可能陸頌雄嘅現代髮型配上古代裝束，違和感覺似乎透出一絲喜感。有口痕網民揶揄佢「成碌葛咁」，不過佢嘅回應都好得體，話「做臨時演員不能夠太搶戲」。
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
