政情：泳池考察 柯創盛試AI溺水偵測

喺試行前，康文署拉埋一眾觀塘區議員睇吓測試過程。觀塘區議會主席柯創盛話系統係透過觀察泳客係咪靜止咗一段時間運作，如發現泳客靜止約10到20秒就會響起警號，原理就係由系統分辨游泳者嘅動作，再以人工智能計算溺水嘅概率，救生員睇到警號後就可以即刻落水救人。

柯仔話測試喺泳池唔同嘅地方進行，都發現冇問題。康文署都強調系統唔會收集或顯示容貌同身體，亦唔會保留影像，以保護泳客嘅私隱。

咁系統可唔可以取代救生員呢？柯仔就認為唔會，而係運用科技、互相配合。而且依家救生員服務緊張，系統都可以加強對泳客嘅服務，對泳客多一層保障。