政情：中山兒童公園一日遊 李鎮強讚應有盡有

睇番佢分享嘅圖片，發現中山市嘅公園有變形金剛、超長瀡滑梯、大型飛機遊玩設施等等，亦都有一啲普遍受小朋友歡迎嘅設施，好似鞦韆等，而且一個公園有27個唔同嘅區域，綠化都做得非常好。

李鎮強話內地呢個公園設施應有盡有，適合唔同年紀嘅小朋友玩，絕對可以令小朋友樂而忘返咁話，又建議康文署喺港島及九龍海濱長廊等地方，參考內地設計同建設更多適合小朋友嘅遊樂設施，如親水設施、大型堆沙池同全天候彈床等，以方便更多父母攜帶小朋友前來遊玩，一起享受天倫樂。