政情：倉鼠慘遭遺棄 方龍飛籲養前要三思

其實方龍飛係收到街坊通知，喺逸東邨善逸樓垃圾房門口發現一個倉鼠籠，上面貼有一張寫上「請收養」嘅字條，而旁邊就係一個載有寵物糧食、木屑等倉鼠用品嘅膠袋。佢擔心籠內倉鼠難以抵受酷熱天氣，於是拎番去議員辦事處，然後出通告，睇吓有冇街坊願意領養。幸好佢未返到去辦事處，就遇到一位熱心街坊話有興趣收養倉鼠。

雖然方龍飛好鍾意動物，亦有去收容流浪狗嘅狗場幫手做義工，但佢強調從來唔養寵物，亦無意成為兩隻倉鼠嘅主人，若過一段時間都無人領養，佢話最終都會拎去愛護動物協會。佢呼籲大家養寵物前須三思而後行，負責任照顧寵物一生一世。