昔日東方政情：盧偉國贈食譜 陳月明送菠蘿作回報
議員盧偉國多才多藝，工程、音樂、烹飪樣樣精通，更素有「立會廚神」嘅稱號。早前佢將過去3年疫情期間，透過社交平台向大家分享嘅食譜結集成書，以非賣品嘅形式送贈各方好友、街坊以及業界持份者，而尋日佢就喺立法會舉行簽名會，獲贈食譜一冊嘅議員陳月明，就以家鄉特產嚟做回禮。
「立會廚神」貼文集結成書
正所謂「投之以桃，報還以李」，陳月明得到盧偉國所撰寫嘅食譜，於是就以打鼓嶺出產嘅本地菠蘿為禮物，送畀對方。陳月明話好尊敬盧，因為佢喺繁忙公務以外，記錄一道又一道嘅美食，用行動表達佢對生活嘅熱愛同嚮往咁話。
至於呢個本地菠蘿，盧偉國有無諗過點樣處理呢？佢話咁新鮮，宜充當飯後水果，結果試食之後，味道頗為清甜。佢又話菠蘿係入饌嘅好材料，無論咕嚕肉、子薑炒牛肉等，都可以發揮相當重要嘅作用，令味蕾嘅享受提升至更高層次。
人人做記者
爆料方法 :
爆料熱線：
(852) 3600 3600
傳 真：
(852) 3600 8800
SMS：
(852) 6500 6500
