笑看天下：司機切勿透支精神

高齡的士司機交通意外頻生係不爭嘅事實，事件一度引來關注，愈來愈多市民支持當局提高的士司機嘅年齡及體檢要求，以確保佢哋符合正常駕駛者嘅健康狀態。事實上，「老當益壯」係諛詞，「年紀大，機器壞」難以避免，的士司機年紀愈大，其體能、專注力及反應會隨之下降，對道路安全帶來更大風險乃必然。日本把上了年紀嘅駕駛一族稱為「老人飛彈」，的確十分傳神！

銅鑼灣告士打道日前發生奪命車禍，60歲的士司機疑收掣不及直插吊臂車底，司機傷重不治，4名乘客受傷。的士司機遺孀透露，丈夫凌晨4、5點工作至晚上9點，每日揸的士近17小時，曾於年內兩釀車禍，其女兒估計父親「有機會瞓唔夠，吊臂車慢駛，佢停唔切衝埋去」。馬路如虎口，駕駛者真要打醒十二分精神，反應唔過嚟就會賴嘢，長時間駕駛精神疲憊，瞌着便大鑊。死者60歲年紀唔算大，之不過長期日揸十幾個鐘頭的士，金屬都會疲勞啦！的士及職業司機因唔夠瞓而闖大禍時有發生，為己為人，司機應自律，切勿透支精神和體力，政府亦應規定職業司機不得長時間工作。