政情：博入鏡李鎮強 一路踎一路唱

其實李鎮強喺舞台上一路唱一路踎低，係要遷就鏡頭角度。話說李鎮強當時選唱台灣歌手黃品源嘅經典名曲《你怎麼捨得我難過》，期間議員陳凱欣走近台前，背向李鎮強舉起手機自拍，而佢呢個動作隨即惹嚟在場其他議員同事加入。

李鎮強見台下影合照咁熱鬧，自己又點可以冇份呢？咁就難免要稍為屈膝啦！喺台下嘅林素蔚同郭偉强都好識做，順勢用手指指向舞台，好讓焦點落番喺李鎮強身上。

呢次合照嘅效果如何？可能要當日出席活動嘅議員至知啦！至於影完合照嘅李鎮強，踎低起身冇頭暈，唱歌依然好中氣冇走音。