政情：體驗氫能 4議員揸鐵騎上陣

話說議員陳克勤尋日喺社交平台上載張相，佢連同陳恒鑌、劉國勳同陳學鋒騎住架電單車，好似「外賣仔」咁。克勤仲懶神秘咁話「搞乜？一陣話你知！」

陳克勤之後冇喺社交平台開估，而事隔幾粒鐘，佢嘅「好兄弟」陳學鋒就爆料，其實佢哋喺月中去內地考察氫能產業園。由於港府近期批出幾個氫能試驗項目，包括氫能洗街車，佢哋都話內地願意免費借出氫能車做試驗。

佢哋參觀之餘亦順便體驗下氫能車，而佢哋化身「外賣仔」騎嘅電單車原來都係氫能車，仲只係靠一樽同滅火筒差唔多大細嘅氫氣瓶推動。不過，依家內地一公斤氫氣要65蚊人民幣，所以佢哋話要諗諗點樣可以降低成本，香港嘅大學都可以同內地合作研發咁話。