夕陽行業吊鹽水 煙稅暴增冇運行

實情又如何？呢，2月公布嘅財政預算案宣布即時增加煙草稅，每包增加12蚊，主流香煙售價一包要78蚊，對於普羅煙民，唔戒煙即係要焗食貴煙，煙癮大嘅就更加攞命！想「飯後一支煙，快活過神仙」嘅就不惜鋌而走險，幫襯私煙。

呢嗱！傳統報紙檔單靠賣報紙根本搵唔到食，惟有賣埋煙仔、蒸餾水及一啲零食撐住；依家因煙稅暴增令生意大跌，唔係啲煙民戒煙，而係轉去食私煙吖！全港報販大聯盟及報販協會發起業界聯署「反對再增加煙草稅」，獲超過500個報攤簽署。有報檔代表大呻，自煙稅大增後，報檔整體生意大跌五成，影響生計，呼籲政府應優先打擊私煙。大聯盟召集人指，自今年2月增加三成煙草稅後，非法私煙嘅宣傳及銷售隨處可見，透過網上或以線下形式，包括俗稱「點心紙」嘅私煙傳單唾手可得，形容「私煙橫行」，拖累報檔生意。

私煙猖獗確係不爭嘅事實，海關近幾個月破獲嘅未完稅煙，市值動輒過億元。5月喺屯門躉船裝卸區破獲嘅懷疑私煙數目高達3,200萬支，估計市值近1.2億元。數據顯示，截至5月30日，檢獲私煙數目達3.94億支，令人咋舌！政府一直強調會嚴厲打擊私煙買賣，之不過有論者指執法部門人手有限，加上私煙集團近年轉以海路走私入口，海關執法愈來愈困難。此外，不法分子透過網上售賣，甚或利用海外登記網站推廣私煙，提供「試食」；可見「道高一尺 ，魔高一丈」！

業界理解政府目標係想降低吸煙率，之但係「私煙問題太明顯太離譜，一日私煙存在，再辣嘅控煙政策也是徒然！」業界所指不無道理。官老爺一見有指摘加煙稅未必能有效控煙就動真火，以為民間百姓睇小政府控煙嘅能力，甚至係侮辱政府控煙嘅決心。點敢吖！業界希望當局認真研究加煙稅帶來嘅弊病，控煙亦應以打擊私煙和防止私煙流入本地市場為首要任務啫！報販協會主席就指今年4月揭發有網站疑似出售私煙，時至7月該網站仍然存在。呢！尋日海關搗破深水埗懷疑私煙儲存倉庫，檢約42萬支懷疑私煙，估計市值約150萬元。利之所在，大有大做，細有細玩！打擊私煙，真係要加把勁！