政情：友父遇騙 江玉歡接投資電話即掛線

點解Doreen嘅朋友會咁講？事緣Doreen好友嘅80歲老父遇上股票投資騙案，對方話可代買A股，提供免費課堂同投資秘笈，老人家喺幾個月內被騙所有積蓄，最後老人家向佢好友提出想將物業加按先揭發事件，但老人家逾百萬元嘅畢生積蓄已經人間蒸發。

Doreen引述話好朋友陪老父報案時，執法人員只係話99%追唔番啲錢，喺報案紙上寫低咗「備案」兩個字。咁朋友問警方點解有電話號碼都唔能夠偵查？執法人員就話雖然依家有實名登記，但以前嘅非實名登記有好多，難以追查。

冇咗畢生嘅積蓄，老人家身心必然受到衝擊。Doreen話騙案削弱人與人之間嘅信任，依家佢聽到任何自稱係銀行、投資等公司嘅電話都即刻掛線，又話通訊、營運商或人際溝通，騙案已將原有嘅系統摧毀，特別係長者，有邊個可以令佢哋信任？

Doreen話前日同朋友去食晏，席間有個朋友話以後服務業嘅人員，唔單止要向客戶問好，都要講：「你今日畀人呃咗未呀？」Doreen話呢句說話表面睇嚟好似好好笑，但亦正正係活生生嘅事實。