政情：對健康有利 老婆陪林超英唔開冷氣

林超英話自己因環保而唔開冷氣，但太太就係由健康角度着眼。佢話太太多年前讀中醫，後來取得註冊執業中醫師資格。而喺修讀中醫過程中，佢太太發現長期身處一個開冷氣嘅環境，乾燥兼且唔自然嘅溫度對身體唔好，尤其不利呼吸系統，林超英認為呢個觀點合乎科學。佢又提到使用分體冷氣機嘅房間，空氣缺乏流通，好容易會吸番自己呼出嘅空氣，結果房間愈來愈多二氧化碳，會導致生理反應遲鈍，對腦袋都唔係咁好。

之不過，若然枕邊人怕熱又點算呢？林超英建議，不妨叫對方睇吓中醫理論。佢話年紀開始大，血氣運行得唔好，尤其是女士嘅「膝頭哥」吹冷氣係咁涼住，對膝關節唔係咁好。