政情：單車亂闖公園 陸靈中婆心苦勸

據運輸署網頁所列出嘅踩單車人士應遵守事項，行人路係唔可以踩單車。而當日陸靈中同康文署職員喺荃灣海濱公園遊樂場巡視時，就見到有外賣平台嘅單車手喺公園內嘅行人路飛馳，情況並不理想。跟住佢哋又見到兩名相信係較專業嘅單車手，無視規則咁喺公園籃球場外踩單車，康文署職員立即上前勸喻，然而其中一人竟然加速疾駛，飛快離開。

喺公職人員眼皮底下公然違規，眾人皆感無奈，而康文署經理就話會喺園內加添圍欄並套上不准踩單車嘅標語，冀藉此加強公園內踩單車飛馳嘅難度，如果情況無改善，就會考慮聯合執法人員打擊違規行為。陸靈中話搵食艱難，外賣平台嘅單車手或會貪快，踩單車穿越公園務求做多一兩張單，但行為或會危害其他享用公園設施市民嘅安全，佢話希望有關人士自重，多啲公德心。